Мұхамедиұлы ісі: экс-министр Райымқұлова сотта мәлімдеме жасады

Астанада Ұлттық музейдің экс-басшысы Арыстанбек Мұхамедиұлына қатысты қылмыстық іс бойынша сот процесі жалғасуда, деп хабарлайды Taulik.kz Ulysmedia.kz-ке сілтеме жасап. Бүгін сотта Қазақстанның бұрынғы Мәдениет және спорт министрі Ақтоты Райымқұловадан жауап алынып жатыр. Ол бұл қызметті 2019 жылдан 2022 жылға дейін атқарды. Сотта ол Ұлттық музейдің айыпталушы директоры 2020 жылы "Алтын адамның әлем мұражайларына шеруі" жобасының ұйымдастыру жұмыстарын жеке өзі басқарғанын айтты. Сонымен қатар Райымқұлова Үндістанда көрмені өткізуге рұқсат бермегенін атап өтіп, жағдайдың қалай болғанын егжей-тегжейлі айтып берді.

"2020 жылдың басынан бастап көптеген елдер көрмелерден бас тарта бастады, өйткені локдаун басталды. Ұлттық музей директоры қандай да бір себептермен Үндістанда көрме өткізуге шешім қабылдады. Мен бұған рұқсат берген жоқпын.  2020 жылдың басынан бері шиеленісті жағдай болды. Ақпан айында көптеген елдер қауіпті жағдайға байланысты көрмелерді қабылдаудан бас тартты. Біз барлық сапарларды, театрландырылған сапарларды, жобаларды, кинофестивальдерді, соның ішінде көрмені тоқтата тұруға кеңес бердік. Рұқсат берілмеді", - деді Райымқұлова.

Ол 2020 жылдың 6 наурызында барлық республикалық, облыстық, ведомстволық бағынысты ұйымдарға шетелге барлық сапарларды тоқтата тұру және тоқтату, кем дегенде бірінші жартыжылдыққа қандай да бір іс-шаралар өткізуден бас тарту қажеттігі туралы хат жіберілгенін атап өтті.

"Мен ешкімге шетелге шығуға рұқсат берген жоқпын, әсіресе жоспарда жоқ Үндістанға. Көрме материалдарының шетелге кеткені туралы мен сол уақытта бір-ақ естідім. Мереке күндері мен ауырып қалдым, бюллетеньде болдым. 12 наурызда Мұхамедиұлынан келген хатты вице-министр қызметіндегі министрдің міндетін атқарушы пысықтады. Бірақ мен тағы да баса айтамын, мен ешқандай рұқсат бермедім. 17 наурызда,  кейінірек елшіден білгенімдей, Үндістанда локдаун жарияланды және барлық іс-шаралар тоқтатылды. Сондықтан көрменің Үндістанға жетіп қойғаны туралы жадынама жасалды, ол 18 наурызда жоспарланған болатын...Үндістан жабылғандықтан, барлық көрме материалдарын елге шұғыл түрде қайтару ұсынылды. Қалған төрт көрмеге бөлінген қаражат республикалық бюджетке қайтарылды", - деп атап өтті Райымқұлова.

Куәдан жауап алу жалғасуда. Қорғаныс жағы Райымқұлованың онлайн жауап бермей, сотқа келіп қатысуын талап етті. Еске салайық, 2022 жылдың 28 мамырында сот санкциясымен Ұлттық музей директоры болған Арыстанбек Мұхамедиұлы қамауға алынды. Тергеу «Алтын адамның әлем мұражайлары бойынша шеруі» халықаралық көрмесін өткізуге, сондай-ақ «Қазақстанның ұлттық киелі нысандары мен музей қорларын жалпымемлекеттік фотограмметриялық 3D-сканерлеу» және «Қазақстан Республикасының Ұлттық цифрлық киноколлекциясын цифрландыру» жобаларына бөлінген бюджет қаражатын ұрлау фактілері бойынша жүргізілді. Бұдан басқа, А. Мұхамедиұлының Мәдениет және спорт министрі лауазымында болған кезінде туыстарының және үлестес тұлғаларының меншігіне «Су және қолданбалы спорт түрлері бойынша республикалық жоғары спорт шеберлігі мектебі» РМҚК, «Қазақ энциклопедиясы» АҚ және «Қазақ ғылыми-зерттеу мәдениет институты» ЖШС заңсыз беруге қатыстылығы тексерілді. Іс бойынша төрт айыпталушы бар: Арыстанбек Мұхамедиұлы (Ұлтық музей директоры), Ұлттық музейдің экс-директоры Алмас Нұразхан, “Экспонат” ЖШС директорының орынбасары Азамат Көшенов, “Экспонат” ЖШС бас бухгалтері Айым Сәдуақасова. Бұдан бұрын Арыстанбек Мұхемадиұлыны адвокаты  Мұстақым Төлеев актер Тұңғышбай Жаманқұлов экс-министр Арыстанбек Мұхамедиұлынан кек алу мақсатында оның үстінен арызданғанын мәлімдеген.

“Тұңғышбай Жаманқұлов көпе-көрінеу жалған ақпарат таратып, менің қорғауымдағы Арыстанбек Мұхамедиұлының үстінен прокуратураға арызданып, соның негізінде заңсыз қылмыстық іс қозғалды”, – деді экс-министрдің адвокаты.

Сондай-ақ, сотталушы Көшенов сотқа Тұңғышбай Жаманқұловты куәгер ретінде шақыруды өтінді. Айтуынша, актер ол туралы "жалған ақпарат берген". Сотталушы не үшін екенін сұрап, Жаманқұловқа хат жазғанда актер "сені танымаймын" деп жауап берген-мыс. Алайда прокурор Зәкіров "оны шақырудың қажеті жоқ" деген болатын. Судья ақыры Тұңғышбай Жаманқұловты сотқа шақырудың маңызы жоқтығын айтып, Көшеновтың өтінішін қанағаттандырмады. Сондай-ақ, судья Мұхамедиұлын үйқамаққа жіберуге де келіскен жоқ. 16 мамырдағы сот отырысында экс-министр прокурорға шүйлігіп, оны қызметінен алып тастауды талап еткен.