«Әуежайды басып алу ісі»: прокурор Әйгерім Тілеужанға 5 жыл жаза сұрады

Қаңтар оқиғасы кезіндегі "әуежай ісі" бойынша Наурызбай аудандық сотында басталған жарыссөз кезінде прокурор Бекзат Сейтімбет судьядан айыпталушылар Қалас Нұрпейісов, Нұрлан Дәлібаев, Ермұхамет Шилібаев, Жанайдар Кәрменовтерге 11 жыл, Әйгерім Тілеужанға бес жыл жаза сұрады, деп хабарлайды Taulik.kz. 30 наурызда Алматыда "Қаңтар оқиғасы кезінде әуежайды басып алу" ісі бойынша бес адамның соты басталған. Тергеу орындары Әйгерім Тілеужан мен Қалас Нұрпейісов Қаңтар оқиғасы кезінде Алматы әуежайында наразы топтың алдында "билікке қарсы сөздер айтып, оларды заңсыз іс-әрекетке айдап салып, жаппай тәртіпсіздік ұйымдастырған" деп айып таққан болатын.

Ал Әйгерім Тілеужанның айтуынша, тағылған айып тек куәгерлердің сөздері негізінде жинақталған. Сондай-ақ журналист бұл істің істің саяси тапсырыс екенін айтып, дәлел ретінде бас прокурор Берік Асыловтың парламентте сөйлеген сөзін мысалға келтірді.

– Маған тағылған барлық айып тек ғана куәгерлердің сөздерінен құрылған. Олардың көпшілігі куәлікті қысыммен берген. Маған қатысты бірде-бір сараптама жоқ. Сараптама жасалған видео біздің шағымымыздан кейін істен алынып тасталды. Видеода менің әуежайда 19 минут жүргенім, ешнәрсені шағуға, халықты бір нәрсені ұрлауға, тонауға шақырмағаным белгілі. 12 куәгер бар. Олардың 10-ы өздеріне қысым жасалғанын айтты.

– Бас прокурор Берік Асылов мені және Қалас Нұрпейісовті Кәрім Мәсімовпен бірге атап, «Экстремистер Алматы әуежайын басып алмақ болды» деп бірқатар заңсыздық жасап, жалған ақпарат таратты. Мен ешқандай діни-экстремистік ұйымның мүшесі емеспін. Біз осыған байланысты ҰҚК мен прокуратураға сауал жолдап, жауап алдық. Ол менің абыройыма нұқсан келтіретін ақпарат таратты. Сонымен қатар кінәсіздік презумпциясын бұзды. Яғни сот болмай жатып, бізді айыптап, соттап жіберді. Әу, баста бұл саяси тапсырыс болған. Бұл елге біз мен сияқты журналист, Қалас Нұрпейісов сияқты мұғалім, мына жігіттер сияқты патриоттар керек емес болып тұр, – деді ол.