Депутат Назарбаев даңғылына ескі атауын қайтаруды ұсынды

Орал қалалық мәслихат депутаты Мақсат Айсауытов Назарбаев даңғылына Достық атауын қайтару туралы ұсыныс білдіріп, оны қала әкімі Миржан Сатқановқа жолдаған, деп хабарлады Taulik.kz Turkistan.kz сайтына сілтеме жасап.

«Орал қалалық мәслихатының депутаты Мақсат Айсауытов қала әкімі Миржан Сатқановқа Оралдың басты көшесін Назарбаев даңғылынан бұрынғы «Достық-Дружба» атауына өзгерту туралы ұсыныспен жүгінді», – деп хабарлайды өңірлік БАҚ.

Депутат сауал жолдағанымен оған әлі жауап алмаған. Жергілікті БАҚ депутаттың бұл ұсынысын көп әріптесі қолдағанын жазады. Ал әкім Миржан Сатқанов бұл мәселені облыстық мәслихат депутаттары шешуі тиіс деген жауап берген. Басылым қазіргі уақытта Назарбаев даңғылының әртүрлі уақытта бірнеше атаулары болғанын атап өтті. Олардың ішінде: Үлкен Михайловская көшесі, Советская көшесі, Сталин көшесі, Ленин көшесі, Ленин даңғылы, Достық-Дружба даңғылы. Соңғы рет даңғыл 2019 жылы Назарбаев даңғылы болып өзгертілді.