Тағы да ұшақ апаты: ұшқыш қаза тауып, 6 адам түрлі жарақат алды
Бразилияның Сан-Паулу штатына қарасты Убатуба қаласында шағын бизнес ұшағы апатқа ұшырады, деп хабарлайды Taulik.kz.
Ұшақ ұшу-қону жолағынан шығып кетіп, өртенген. Оқиға барысында ұшқыш қаза тауып, алты адам түрлі жарақаттар алды.
Жергілікті БАҚ мәліметінше, Cessna 525 CitationJet маркалы жеңіл бизнес-джет ұшағы ұшу-қону жолағынан жоғары жылдамдықпен шығып кетіп, жағажай маңында өртке оранған. Әлеуметтік желілерде жарияланған видеолардан апаттың айтарлықтай ауыр болғаны байқалады.
Ұшақ бортында ұшқыш пен төрт жолаушы болған. Ұшқыш қайтыс болған, ал ерлі-зайыпты және екі бала ұшақтан аман шығып, ауруханаға жеткізілген. Сонымен қатар, жағажайда болған тағы екі адам жарақат алғаны белгілі болды.
Әуежайды басқару компаниясының өкілі апатқа ауа райының қолайсыздығы мен ұшу-қону жолағының тайғақтығы ықпал етуі мүмкін екенін атап өтті. Оқиға себептері бойынша тергеу басталды.