11 қарашада Ресейдің әйгілі әрі даулы тележүргізушісі Владимир Соловьёвтың «Вечер с Владимиром Соловьёвым» бағдарламасында Қазақстан мен Орталық Азия елдерінің Ресей үшін маңызы талқыланды.
Бағдарламада кейбір қатысушылар Ресейге аймаққа көбірек көңіл бөлу қажет екенін айтты. Мемлекеттік Дума депутаты Андрей Луговой:
«Біздің назарымыз Орталық Азияға, әсіресе Қазақстанға бағытталуы керек. Біз қазақ тілін білетін мамандарды даярлауымыз қажет», — деді.
Оның айтуынша, Ресей аймақтың экономикалық және саяси әлеуетін елемеуге болмайды.
Бағдарлама барысында кейбір қонақтар Қазақстанда «барлық ресми құжаттар тек орыс тілінде жүргізіледі» деген жалған пікір айтты. Алайда Caravan.kz басылымының мәліметінше, ресми деректер бойынша құжат айналымының 80 пайыздан астамы мемлекеттік — қазақ тілінде жүзеге асырылады.
Осы деректен кейін студияда Ресей шенеуніктері қазақ тілін үйренуі керек деген пікір туындады. Бұл — Қазақстанмен терең әрі сапалы диалог орнатуға мүмкіндік береді деген оймен айтылды.
Айта кетейік, Владимир Соловьёвтың бағдарламалары бұған дейін де Қазақстан тақырыбында даулы пікірлермен есте қалған. 2018 жылы ол Қазақстанның латын әліпбиіне көшуін сынға алып, өңірдегі саяси процестер туралы өткір мәлімдемелер жасаған болатын.
Ресей билігі тарапынан әзірге қазақ тілін білу жөнінде ресми талаптар туралы ешқандай түсініктеме берілген жоқ.