Украина президенті Владимир Зеленский Сауд Арабиясына алдын ала жоспарланған сапармен барды, деп хабарлайды BBC.
Сапар барысында ол Мекке губернаторының орынбасары ханзада Сауд бин Мишаал бин Абдулазизбен кездесті. Зеленский Таяу Шығыстағы әріптестерімен қауіпсіздік мәселелерін талқылап, маңызды келіссөздер жоспарланғанын айтты.
Оның айтуынша, Украинада жиналған тәжірибе, әсіресе дрон технологиялары саласындағы жетістіктер, Парсы шығанағы елдерінің қауіпсіздігін күшейтуге көмектесе алады. Зеленский бұл жөнінде сапар алдында да мәлімдеп, украиналық ұшқышсыз ұшу аппараттарын аймақта қолдану мүмкіндігін ұсынған.
Президент энергетикалық қауіпсіздік мәселесіне де тоқталды. Оның сөзінше, мұнай мен газ ресурстары, сондай-ақ әлемдік нарықтардың тұрақтылығы көптеген елдердің, әсіресе Еуропаның өмір сүру деңгейіне тікелей әсер етеді.
Зеленский дрондарды тек өндіру ғана емес, оларды нақты жағдайда қолдану тәжірибесі маңызды екенін атап өтті. Украинада мұндай тәжірибе бар екенін айтып, оны серіктестермен бөлісуге дайын екенін жеткізді.
Сонымен қатар ол Таяу Шығыс елдерінен Украинаға қолдау көрсетуді сұрады. Атап айтқанда, әуе қорғаныс жүйелеріне қажетті зымырандар мәселесінде көмек күтіп отырғанын айтты.
Украиналық дрон жасаушы компаниялар да Парсы шығанағы елдерінен ынтымақтастық ұсыныстары түскенін мәлімдеген. Алайда мұндай келісімдер әлі Киев билігінің ресми мақұлдауын алмаған.