Қазақстандық азамат журналист Лұқпан Ахмедияровты жауапқа тартуды сұрап, Бас прокурорға жүгінді, деп хабарлайды Taulik.kz, nehabar телеграм арнасына сілтеме қалдырып.
«Мен ешқашан соғысқан емеспін»: Өскемен тұрғыны Бас прокуратурадан Лұқпан Ахмедияровты жауапқа тартуды сұрады
«Кінәсіз екенімді дәлелдеуге мәжбүрмін»: Өскеменнің тұрғыны Лұқпан Ахмедияровты жала жапқаны үшін жазалауды сұрады
Өскеменнің тұрғыны Андрей Котов Қазақстанның Бас прокуроры Берік Асыловқа бейнеүндеу жолдады. Ол өзінің аты-жөні Ресей мен Украина арасындағы соғысқа қатысты делінген қазақстандықтардың тізіміне енген жарияланымға байланысты жағдайға назар аударуды сұрайды.
Котовтың айтуынша, ол ешқашан соғысқа қатыспаған. Осыған байланысты ол журналист Лұқпан Ахмедияровтың әрекетіне құқықтық баға беруді сұрап отыр.
Андрей Котовтың айтуынша, 2024 жылы Ахмедияров Instagram және YouTube желілерінде Ресей мен Украина арасындағы қарулы қақтығысқа қатысты делінген Қазақстан азаматтарының тізімін жариялаған. Котов сол тізімнен өзінің деректерін көргенін айтады.
«Мен бұл қарулы қақтығысқа да, соғысқа да қатысқан емеспін. Украинада ешқашан болмағанмын және бұл ақпаратты толығымен жоққа шығарамын. Бұл тізімге қалай кіріп кеткенімді білмеймін», - деді Котов бейнеүндеуінде.
Ер адамның айтуынша, жарияланым шыққаннан кейін оған полиция қызметкерлері келіп, қайда болғаны және қайда барғаны туралы сұрақтың астына алған. Котов құқық қорғау органдарына сұратылған барлық ақпаратты бергенін айтады.
Алайда Котовтың сөзінше, жарияланымның салдары оның күнделікті өміріне де әсер еткен. Оның отбасымен, достарымен, әріптестерімен және көршілерімен қарым-қатынасы нашарлаған. Енді ол айналасындағы адамдардың сұрақтарына жауап беріп, соғысқа қатыспағанын қайта-қайта дәлелдеуге мәжбүр екенін айтады.
Котовтың айтуынша, ол туралы ақпарат тиісті деңгейде тексерілмей таратылған. Сондай-ақ ол кейін Ахмедияровтың бейнежарияланымын көргенін айтады. Котовтың сөзінше, журналист онда нақты ол туралы айтылмағанын, әңгіме аты-жөні ұқсас басқа адам жайында болғанын мәлімдеген. Алайда Котов бұл пікірмен келіспейді. Өйткені оның айтуынша, жарияланған тізімдегі адамның аты-жөні мен туған күні оның деректерімен сәйкес келген.
Енді Өскеменнің тұрғыны Қазақстанның Бас прокуроры Берік Асыловқа тікелей жүгініп отыр. Ол прокуратурадан болған жағдайдың мән-жайын анықтап, оған құқықтық баға беруді және тиісті шаралар қабылдауды сұрайды.
«Құрметті Қазақстан Республикасының Бас прокуроры Берік Асылов, осы мәселеге назар аударып, тиісті шаралар қабылдауыңызды сұраймын. Лұқпан Ахмедияровты жауапқа тартып, заң аясында қатаң жазалауды сұраймын», - деді Андрей Котов өз үндеуінде.