Қазақстанда алтын бағасы бір апта ішінде шамамен 2 пайызға өсті. Ұлттық банктің мәліметінше, 6 қарашада бағалы металдың бір грамы 59 908,21 теңгеге жетті, деп хабарлайды Taulik.kz сайты Baspasoz.kz-ке сілтеме жасап.
Бір апта бұрын алтынның бір грамы 58 739,40 теңге болған. Осылайша, жеті күн ішінде оның құны 1 168,81 теңгеге қымбаттаған.
Ал әлемдік нарықта алтын бағасы керісінше төмендеді.
Reuters агенттігінің 2026 жылғы 6 қарашадағы мәліметіне сәйкес, алтынның әлемдік нарықтағы бағасы 1 пайызға арзандап, бір трой унциясы 4 047,19 доллар болды.
АҚШ нарығында желтоқсан айына арналған алтын фьючерстерінің бағасы да төмендеген. Атап айтқанда, олардың құны 1,4 пайызға азайып, бір унциясы 4 056,90 долларды құрады.
Осылайша, Қазақстанда алтынның теңгемен есептелген бағасы өсіп жатқанымен, халықаралық нарықта бағалы металл арзандаған.