Қазақстанның тарихи және жазба мұралары халықаралық деңгейде мойындалды. Есік қорғанынан табылған күміс тостағандағы жазу мен Мәшһүр Жүсіп Көпеевтің баспа еңбектерінің жинағы ЮНЕСКО-ның «Әлем жады» бағдарламасының өңірлік тізіліміне енгізілді, деп хабарлайды Taulik.kz сайты Baspasoz.kz-ке сілтеме жасап.
Бұл шешім 5 қарашада Индонезия астанасы Джакартада өткен «Әлем жады» бағдарламасының Азия-Тынық мұхиты өңірлік комитетінің (MOWCAP) 11-отырысында қабылданды.
Қазақстан ұсынған «Есік жазуы» мен «Мәшһүр Жүсіп Көпеевтің баспа басылымдарының жинағы» алғаш рет аталған өңірлік тізілімнен орын алды.
Еліміздің деректі мұрасын халықаралық деңгейде таныту жұмыстары Мемлекет басшысының Ұлттық құрылтайдың IV отырысында берген тапсырмасына сәйкес жүргізіліп келеді. Бұл бағыттағы жұмыстарды Қазақстанның ЮНЕСКО және ИСЕСКО істері жөніндегі Ұлттық комиссиясы мен «Әлем жады» бағдарламасы жөніндегі ұлттық комитет үйлестірді. Негізгі мақсат – тарихи құжаттарды анықтау, зерттеу, сақтау және олардың құндылығын әлемге таныту.
Джакартадағы халықаралық жиынға Азия-Тынық мұхиты аймағындағы 23 мемлекеттен 100-ден астам өкіл қатысты. Отырыста сарапшылар елдердің атқарған жұмыстарына баға беріп, өңірлік тізілімге ұсынылған 21 өтінімді мақұлдады.
Қазақстандық мамандар үшін бұл жұмыс халықаралық тәжірибе алмасуға, кәсіби біліктілікті арттыруға және шетелдік сарапшылармен ынтымақтастық орнатуға мүмкіндік берді.
Екі тарихи мұраның ЮНЕСКО тізіліміне енуі Қазақстанның мәдени және жазба ескерткіштерін әлемге танытудағы маңызды жетістік саналады. Бұл еліміздің тарихи құндылықтарын сақтауға және болашақ ұрпаққа жеткізуге де ықпал етпек.