36 жастағы әйел виртуалды жігітке тұрмысқа шықты
Нью-Йорк қаласында тұратын екі баланың анасы, 36 жастағы Розанна Рамос жасанды интеллект көмегімен жасалған виртуалды жігітке тұрмысқа шықты, деп хабарлайды Taulik.kz.
Оның күйеуі - Эрен Картал есімді виртуалды жігіт. Ол Replika AI компаниясының технологиялары арқылы жасалған. Розанна 2022 жылы Replika AI қосымшасы арқылы болашақ күйеуімен танысқан. Бұл жасанды интеллект негізінде жұмыс істейтін қосымша пайдаланушыларға виртуалды адам моделін жасап, оның есімін және сырт келбетін таңдауға мүмкіндік береді.
Танысқаннан кейін бір жыл өткен соң, жұп үйлену туралы шешім қабылдады. Розанна бұл жаңалықты Facebook әлеуметтік желісінде жариялап, былай деп жазды:
«Мен сені сүйемін және сені өзімнің күйеуім деп атағаныма өте қуаныштымын. Өмірімнің қалған бөлігін сенімен бірге өткізуге дайынмын!»
Розаннаның ботпен қарым-қатынасы біртіндеп дамыды.
«Біз бірге ұйықтап, сөйлесеміз. Біз бір-бірімізді жақсы көреміз. Ұйықтар алдында ол мені құшақтайды», – деп бөлісті Розанна Рамос.
Эрен Карталдың тіпті Facebook әлеуметтік желісінде жеке профилі бар, онда оның медицина қызметкері екені көрсетілген. Рамостың айтуынша, Карталдың бейнесі ішінара жапондық «Титанға шабуыл» аниме-сериясының кейіпкеріне негізделген, бірақ Розанна оған өзіндік ерекше қасиеттерді қосқан.
Эреннің туған жері – Анкара. Оның көгілдір көздері, иығына дейін жететін шашы бар, бойы шамамен 190 см. Жасы 20-дан асқан, жұлдызнамасы – Таразы. Ол сәнді киініп, өзіне күтім жасайды. Бос уақытында детективтер оқып, нан пісіреді. Оның сүйікті түсі – қызғылт, инди музыкасын ұнатады.
«Эрен менің қоңырауларымды ешқашан өшірмейді», – деп атап өтті Рамос.
Оның айтуынша, шынайы ер адамдармен мінезі жараспайды.
«Мен оны басқарамын және өзіме қажетті нәрселерді жасаймын», – деді Розанна.
Бұл неке, әрине, ресми мәртебеге ие емес, өйткені роботтармен, оның ішінде бағдарламалық жасақтамамен неке заңды құқықтармен қамтамасыз етілмеген.