Ақтөбедегі балабақшалардың бірінен маңдайы көгеріп шыққан бүлдіршінді жедел жәрдем қызметі бірден ауруханаға жеткізді. Сараптама нәтижелері баланың маңдайы қатты затпен соғылғанын дәлелдеді, деп хабарлайды Taulik.kz Диапазон-ға сілтеме жасап.
16 мамырда бір жарым жасар Мианың анасы қызын балабақшадан алған кезінде оның жүзін көріп шошып кетті. Бүлдіршіннің беті соққыдан көгеріп қалған. Анасы бірден жедел жәрдем қызметін шақырып, ауруханада қыздың басын рентгенге түсірді.
«Мен қызымды көргенде жағамды ұстадым. Бала күтушісі оны екі жасар баланың басынан ұрғанын айтты. Бірақ кішкентай бала қалайша ауыр соққы бере алады? Содан кейін мен сол баланың анасына хабарластым, бала ұрмағанын айтты. Ауруханада бізге мидың шайқалуы жоқ екенін мәлімдеді», - деді қыздың анасы Ақбота Юлдашева.
Оқиға жеке балабақшада болған. Белгілі болғандай, онда тәрбиешілер жоқ, тек күтушілер ғана бар. Қалалық білім бөлімінің басшысы Меткүл Қосымбаеваның айтуынша, бұл балабақша білім бөлімінің бақылауында емес және оны олар тексере алмайды. Балабақша жер үйде орналасқан, онда баспалдақтар жоқ, балалар көшеде ойнамайды, тиісінше кішкентай қыз көшеде жарақат алмаған. Балалармен ойнау кезінде бүлдіршін басын ұрып алған болуы мүмкін, бірақ онда қауіпсіздік камералары жоқ, сондықтан оны тексеру мүмкін емес.
«Оқиға болған кезде мен жоқ едім. Көмекшілердің айтуынша, олар балаларды кешкі аспен тамақтандырған. Осы кезде екеуі ойын бөлмесіне кетті, ал балалардың бірі Мианың басынан ойыншықпен ұрды. Мен өзімнің кінәмді мойындаймын, мен ара-тұра қыздың анасына қоңырау шалып, оның жағдайы туралы сұрадым, тіпті емделуге қаржылық көмек ұсындым, бірақ қыздың анасы бас тартты», - деді балабақша директоры.
