Сыбайлас жемқорлыққа қарсы іс-қимыл агенттігі білім беру саласындағы жүйелі проблемаларды анықтады. Қазіргі кезде 102 қылмыстық іс тергелуде, деп хабарлайды Taulik.kz.
Антикор төрағасы Асхат Жұмағалидің айтуынша, сыбайлас жемқорлыққа қарсы іс-қимыл агенттігінің негізгі бағыттарының бірі ретінде Жемқорлық тәуекелдерінің картасы қолданылады. Картаны іске асыру кезінде жемқорлық тәуекелдеріне білім беру саласында сыртқы талдаулар жүргізілді. Жемқорлық көріністерін жою үшін алдын алу құралдарын пайдалану басымдыққа ие.
«Біз үшін «адам орталықтылығы» қағидаты басымдыққа ие. Мемлекеттік органдар азаматтардың өмірін жақсартуға баса назар аударуы тиіс. Осыған сүйене отырып, Агенттік жұмыстағы тәсілдерді түбегейлі қайта қарады. Жемқорлық тәуекелдерінің карталары басты бағдар болды», - деп атап өтті Асхат Жұмағали.
Жалпы агенттіктің интеграцияланған талдауды пайдалануы көптеген жемқорлық схемаларын егжей-тегжейлі анықтауға мүмкіндік берді. Соның арқасында білім беру саласында қылмыстар әшкере болды.
"Алматы, Шымкент және Талдықорған қалаларының, Қызылорда және Ақтөбе облыстарының білім беру саласындағы лауазымды тұлғаларына қатысты қылмыстық істер тергелуде. Осылайша, мектеп директорлары мен бухгалтерлері бухгалтерлік есеп жүйелерін қазынашылықпен және басқа мәліметтер базасымен интеграциялаудың жоқтығын пайдаланып, бюджет қаражатын жымқырған. Бұл білім бөлімдерінің басшылары мен мемлекеттік аудиторларды қамту кезінде болған",- деді А. Жұмағали.
Елімізде 7,9 млрд теңге шығынмен білім саласында 102 қылмыстық іс тіркелген. Жемқорлық тәуекелдерін жою үшін әр түрлі салаларда 1100-ден астам ұсынымдар әзірленсе, олардың 33%-ын мемлекеттік органдар орындаған.
