Жетісу облысындағы тексеру жұмыстарының нәтижесі бойынша Текелі қаласындағы лагерьлердің бірінде «Параноидты шизофрения» диагнозымен есепте тұрған медицина қызметкері анықталды, деп хабарлайды Taulik.kz.
Облыстағы 9 балалар лагерінің қызметіне тексеру жүргізіліп, жұмыстарының заң талаптарына сәйкес келмейтіні анықталды. Соның ішінде Көксу ауданындағы «Қарлығаш» лагерінде санитарлық-эпидемиологиялық нормаларға қайшы, балаларға арналған азық-түлік қауіпсіздік сертификаттарынсыз сатып алынған. Тіпті күнделікті балаларға арналған тамақтану нормалары сақталмаған.
“Лагерьлердің барлығында дерлік өрт қауіпсіздігі нормалары сақталмайды. Алғашқы өрт сөндіру құралдары - өрт сөндіргіштер мен өрт гидранттары жоқ, өрт кезінде эвакуациялық жолдардың кедергісіз шығуы қамтамасыз етілмеген. Кейбір лагерьлерде мерзімі өткен дәрі-дәрмектер сақталған”, – делінген хабарламада.
Ал Алакөл ауданына қарасты "Шағала" лагерінде балалардың бос уақытын өткізетін ойын-сауық кешендерінің орны да көрінбеген.
“Негізгі (ғимараттар, үйлер) және қосалқы (ас үй, жуынатын бөлмелер және т.б.) лагерь ғимараттары тозған, күрделі жөндеуді қажет етеді. «Шағала» лагерінде (Алакөл ауданы) ойын-сауықтыру кешендері мүлдем жоқ”, – деп мәлім етті ведомство.
