АМӨЗ бұрынғы басшысы Шухрат Данбайды ақтау үкімінің күші жойылды, деп хабарлайды Taulik.kz.
Жоғарғы сот Атырау мұнай өңдеу зауытының бұрынғы басшысы Шухрат Данбай мен сатып алу департаментінің директоры Қанат Сейдуалиевті ақтау үкімінің күшін жойды. Бұған дейін олар мемлекетке 3 миллиард теңгеге жуық залал келтірді деп айыпталып, кейін қылмыстық құқық бұзушылықтың болмауына байланысты кінәсіз деп танылған.
Шухрат Данбай 2019 жылдың ақпанынан 2021 жылдың шілдесіне дейін Атырау мұнай өңдеу зауытын басқарды. Ол президент Қасым-Жомарт Тоқаевтың Қазақстандағы мұнай өңдеу зауыттарының қызметін тексеруді, сондай-ақ Атыраудағы кәсіпорынның жұмысын тоқтатуға жауаптыларды жазалауды тапсырған сынынан кейін қызметінен босатылды.
Нәтижесінде бұрынғы бас директор 2022 жылы ақпанда Алматыда ұсталды. Онымен бірге Атырау мұнай өңдеу зауытының сатып алу департаментінің директоры Қанат Сейдуалиев те айып тағылымында болды.
Іс материалдарынан анықталғандай, 2019-2020 жылдары «Мұнайды Жетілдірілген өңдеу кешені» құрылысын жүргізу кезінде Данбай мен Сейдуалиев ЖШС жарғысының және реттелетін келісімнің талаптарын бұза отырып, мердігерден шығынды өндіруге шара қолданбаған, жеткізілген ақаулы жабдықты немесе оны ауыстыруды кепілдік міндеттемелері бойынша мердігерден талап етпеген. Осылайша тергеу деректері бойынша, олар мемлекетке 2,9 млрд теңгеден астам шығын келтірген.
Алайда, Атырау қалалық №2 соты олардың әрекетінде қылмыстық құқық бұзушылықтың болмауына байланысты барлық баптар бойынша кінәлі емес деп таныды, өйткені мердігерлер қосымша шығынға ұшырады, бұл мемлекеттік сараптамалардың қорытындысымен расталған және залал жоқ. Облыстық прокуратура бұл үкіммен келіспегенімен, облыстық сот 2023 жылдың шілдесінде қадағалау органының наразылығын қабылдамай, ақтау үкімін күшінде қалдырған.
Бүгін Жоғарғы Соттың баспасөз қызметі Orda.kz тілшісіне кассациялық органның аталған айыпталушыларға қатысты ақтау үкімін бұзып, істі жаңадан сот талқылауына жібергенін растады.
Айта кетейік, 2017 жылдың күзінде дизельдік отын дағдарысы кезінде Энергетика министрі Қанат Бозымбаев Данбайды қатты сынға алған болатын. Ол басқаратын Павлодар мұнай-химия зауытында дизельдік отын өндіруге қажетті сутегі өндіру қондырғысы бірнеше аптадан бері жұмыс істемей тұрғаны белгілі болды. Одан кейін келеңсіздікке кінәлі ретінде құбырдағы тігісті қате дәнекерлеген дәнекерлеуші танылды. Шухрат Данбай бас директор қызметінен «өз еркімен» кетуге мәжбүр болды.