Айтыскерлер жаңадан сайланған депутаттарды мазақ қылды

Парламентке жаңадан сайланған депутаттардың ант бергенін әзіл-қалжыңмен жеткізген айтыскерлер көпшілікті күлкіге қарқ қылды, деп хабарлайды taulik.kz Elorda.info сайтына сілтеме жасап.  Белгілі болғандай, Ақын Жандарбек Бұлғақов, Сырым Әуезхан мен әзілкеш, актер Дәулет Бижанов ант беруге қиналған депутаттарды мазақ қылған.

«Мыңқылдап тұрып ант бердің, Парлементтен тақ берді, Секретарша дәптерге, Жазып берсе де бас әріптермен, Айт дегенде айтпады, шап дегенде шаппадың, Жаттағансыз қалай, балабақшаның тақпағын? Халықта мың сұрақ, Ант беру бір сынақ, Барлығын тыңдадық, бір күліп, бір жылап. Депутат болдың-ау, бір тұрып, бір құлап, – дейді ақындар шенеуніктерді кезек-кезек жырлап. «Парламенттің көрмеген түрін бұрын, Біреулерге өзгерді өмір бүгін, Ақ ниетпен жұмысты бастағайсың, Ағарып тұр «бежевый» орындығың», – деп айтыскерлер сайлау туралы ойын қағытпа қалжыңмен жеткізді. Әлеуметтік желіде айтыскерлердің әзіл-шыны аралас әнін қолдайтындардың қарасы көп.

Желі белсенділері айтыскерлерге: «Жарасымды, дәл», «Депутаттар сіздердей нық сөйлесе, ант беруден кейін алаңсыз ұйықтар едік», «Керемет, әзілмен шынайы жеткізілді», «Сөз тапқанға қолқа жоқ», «Ризамын», – деген пікірлерін жаудырып жатыр.