Индустрия және инфрақұрылымдық даму министрі Марат Қарабаев жеңілдетілген автонесие бағдарламасын қайта қарау жоспарланып отырғанын айтты, деп хабарлайды taulik.kz Massaget.kz сайтына сілтеме жасап.
Министрдің айтуынша, бағдарламаға бірден төрт тармақ бойынша өзгеріс енгізу жоспарланып отыр. Алғашқы тармақтардың бірі - автокөлікке алғашқы жарна енгізу.
"Бірінші мәселе - бастапқы жарна. Ол ешқашан болған емес, бірақ енді ол көлік сомасының 15 пайызы болады.
Екіншісі - қоғам мен БАҚ-тың талабы бойынша көлікті алғандардың аты-жөні жарияланады.
Үшінші тармақ - бағдарламаға қатысу үшін қандай көліктерге рұқсат етілетіні бойынша өзгеріс енгізіледі. Қазір бағдарлама 10 миллион несие сомасына және 15 миллион көлік сомасына мүмкіндік береді. Kia Sportage және Hyundai Tucson сияқты брендтердің қатысуын қайта қарастыруымыз мүмкін. Тағы да айтамын, бұл түпкілікті шешім емес, оны талқылап жатырмыз", - деді Қарабаев Үкімет отырысы кулуарында.
Министрдің айтуынша, төртінші тармақ - ең маңыздысы, өйткені ол өтініш берушінің ең жоғары жалақы шегіне қатысты болады.
"Біз жалақының ең жоғары шегін белгілеуді қарастырамыз, яғни белгілі бір жалақы мөлшерінен жоғары алатын адамдар қатысуға құқылы болмайды, өйткені аз (табысы бар - еск.) адамдар үшін автонесие бағдарламасын қолжетімді еткіміз келеді", - деді ведомство басшысы.
Бұл ретте Қарабаев автонесие бағдарламасын іске қосу үшін бір ай ішінде тағы бір миллиард теңге жинау қажет екенін мәлімдеді.
"Қазір ай сайын шамамен миллиард теңге қайтарылады. Бұл қаражат 100 көлікке жетеді. Енді 500-ге жуық көлікке қаражат жеткілікті болғаннан кейін бағдарламаны іске қосатын механизмді қарастырып жатырмыз. Яғни, бұл бес миллиард және одан жоғары. Қазір төрт миллиард бар, бір ай ішінде тағы бір миллиард жинаймыз, содан кейін бағдарламаны тағы бір рет жариялаймыз, сонымен қатар онлайн (болады - еск.). Бұл - ең ашық механизм", - деді Марат Қарабаев.
