Ерлан Мазан атты желі қолданушы өзінің Facebook-тегі парақшасына Қазақстан жерінің Қытайға сатылып жатқанын жазды, деп хабарлайды Taulik.kz Halyq-uni.kz-ке сілтеме жасап.
Ойда-жоқта Қытайдағы жер жалдау сайтына тап болып, таңқалдым. Әлгі Жер кодексі арқылы шетелдіктерге жалға берілмейтін болып шешілген ауылшаруашылық мақсатындағы қазақтың жері ол сайтта арзан бағамен ашық саудаға салынып жатыр. Бұл енді барып тұрған бассыздық қой! - деді жазба авторы.
Бірақ оған қатысты Ауыл шаруашылығы министрлігі дереу үн қатты. Тіпті, ведомствоның баспасөз хатшысы бұл қауесетке түсінік берерде эмоциясын ұстай алмай қалған.
"Оттамасын! Алақандай жер болса да шетелдіктерге сатылмайды және жалға да берілмейді! ҚР Жер кодексінің 24-бабына сай Ауыл шаруашылығы мақсатындағы жер учаскелерiн шетелдіктерге беруге қатаң тыйым салынған.
Тіпті шетелдіктермен немесе азаматтығы жоқ адамдармен некеде тұрған Қазақстан азаматтарына жер берілмейді!» - деді ҚР АШМ баспасөз хатшысы Дамир Аспан.
Артынша Жер комитетінің төрағасы – ҚР Жерді пайдалану мен қорғау жөніндегі бас мемлекеттік инспекторы Мұрат Теміржанов та пікір білдірді.
Әлеуметтік желіде жарияланған Қытай елінің сайтындағы Қазақстан аумағындағы жерлердің сатылатындығы туралы ақпарат жалған екендігін мәлімдейміз. Сонымен қатар Кодекстің 38-бабының 5-тармағына сәйкес жеке және заңды тұлғаларға уақытша жер пайдалану құқығымен тиесiлi ауыл шаруашылығы мақсатындағы жер учаскелерiн ауыл шаруашылығы өндiрiсiн жүргiзу үшiн кейiнгi жер пайдалануға (субарендаға) беруге жол берiлмейдi.
Егер кез келген субъектілер тарапынан аталған заң нормаларын бұзу деректері анықталған жағдайда оларға жол берген субъектілер заңнама талаптарына сәйкес жауапқа тартылады және бұл мәселе министрліктің тұрақты бақылауында», - деді Мұрат Теміржанов.
