Павлодарда сауда үйінің шатыры қирап, адамдар зардап шекті

Павлодарда сауда үйінің шатыры қирады, деп хабарлайды Taulik.kz Tengrinews.kz-ке сілтеме жасап. Оқиға 7 шілдеде түс ауа 14:00 шамасында болған. Павлодар облысы Төтенше жағдайлар департаментінің "112" пультіне сауда үйінде шатырдың опырылғаны туралы хабарлама келіп түсті. Оқиға орнына құтқарушылар мен Апаттар медицинасы орталығының қызметкерлері барғаны айтылды. Облыстық Төтенше жағдайлар департаментінің баспасөз қызметі мәліметінше, сауда үйінің бүйіріндегі шатыры опырылып, дәмхананың жазғы алаңы үстіне түскен. Куәгерлердің айтуынша, үйінді астында адамдар болған. Құтқарушылар құрылысты бөлшектеуге кірісті. 1975 жылы туған бір ер адам үйінді астынан шығарылып, ауруханаға жатқызылды. Оған екі аяғының сынуы деген диагноз қойылған. Жұмыс жалғасып жатыр. Тағы бір ер адам құтқарушылар келгенше жедел жәрдеммен ауруханаға жеткізілген.