Бұл туралы саясаттанушы Шалқар Нұрсейіт Facebook желісіндегі ресми парақшасында жазып, биліктің халық наразылығынан үрейленгенін атап өтті.
Саясаттанушының пікірінше, Ақорда мен күштік құрылымдар халықтың наразылығынан қорқып, азаматтарды бақылауда ұстау үшін түрлі шараларға барып отыр.
"Ақорда мен күштік құрылымдар "халық көтеріліп кетпесе болды" деген үреймен әділет іздеген қарапайым азаматтарды да алдап-арбауға, үркітуге, айыппұл салуға және қамауға дайын екенін көрсетті", – деді ол.
Әділетті Қазақстан: арман ба, ақиқат па?
Шалқар Нұрсейіттің айтуынша, Әділетті Қазақстан тек халық өз мемлекетіне сенім артқанда ғана құрылады. Ол мұндай сенімді тек мемлекеттің қорғансызға қорған болып, сот жүйесінің әділ әрі ашық болуынан күтуге болатынын айтады.
"Әділетті Қазақстан "заң диктатурасымен" орнамайды. Бұл елде азаматтар мемлекеттен әділет күтіп, сот пен құқық қорғау органдарына сенуі қажет. Алайда, қазіргі Қазақстанда бұл сәттің жақын арада туатыны екіталай", – деп пікір білдірді саясаттанушы.
Талғардағы оқиғаға шолу
Талғарда жаппай төбелес салдарынан 16 жастағы Шерзат Болат қайтыс болды. Осы оқиғадан кейін марқұмның ағасы Нұрқанат Ғайыпбаев та белгісіз жағдайда көз жұмды. Полиция дерегі бойынша сараптама қорытындысы марқұмның өзін-өзі асу арқылы қайтыс болғанын көрсетті делінген.
Осы қайғылы оқиғалардан кейін Шерзаттың әкесі Қаржаубай Нұрымов әділет іздеп, көпшілікпен кездесуді талап етті. Бірақ полиция оның агрессивті мінез-құлқын себеп етіп, оны қамауға алды.
Нұрымов отбасының жағдайы
Шерзаттың әпкесі мен әкесі де құқық қорғау органдарымен қақтығыс салдарынан түрлі айыптар бойынша жауапкершілікке тартылды:
Қаржаубай Нұрымов қоғамдық тәртіпті бұзғаны үшін 15 тәулікке қамалды.
С. Нұрымоваға ұсақ бұзақылық үшін 20 АЕК айыппұл салынды.
Б. Реймова әкімшілік құқықбұзушылық үшін 15 тәулікке қамалып, кейін елден шығарылды.
Қоғамдық пікір
Шалқар Нұрсейіт Талғардағы трагедия мен биліктің әрекеттерін Қазақстандағы жүйелі проблемалардың айқын көрінісі ретінде қарастырады. Оның пікірінше, бұл оқиғалар биліктің өзі қалыптастырған жүйенің қаншалықты әлсіз әрі тиімсіз екенін көрсетеді.
"Ескі Қазақстанның саботажына сілтейтін конспирологтар шықса, таңғалмаймын. Алайда, қазір билікті дискредитациялайтын басқа саяси күш жоқ", – деп түйіндеді саясаттанушы.