Генпрокуратура еліміздің мұнай өндіретін ірі компаниясы «Маңғыстау мұнай газ» АҚ-ны экологияға зиянды әрекеттері үшін 32,2 миллиард теңге көлемінде айыппұл салуға шешім қабылдады.
Компанияның қызметінде бірнеше экологиялық бұзушылықтар анықталды. Біріншіден, мұнай кәсіпшілігі жер астына лас суларды төккен және өнім қалдықтарын жинау шектеулерін орнатпаған. Сонымен қатар, мұнайды жылыту пештерінен зиянды заттардың ауаға шығуы нормаларды асырып, экологиялық қауіпті жағдай туғызған.
Бұл бұзушылықтардың алғашқы екеуі бойынша «Маңғыстау мұнай газ» Әкімшілік құқық бұзушылықтар кодексінің 328-бабы (қоршаған ортаға антропогендік әсердің нормаларын бұзу) бойынша әкімшілік жауапкершілікке тартылып, 31 миллиард теңге айыппұл салынды. Ал үшінші бұзушылыққа байланысты компания тағы да жауапқа тартылып, 2024 жылдың 11 желтоқсанында 1,2 миллиард теңге көлемінде айыппұл төлеуге міндеттелді. Барлық бұзушылықтар бойынша компанияның жалпы айыппұлы 32,2 миллиард теңгені құрады.
«Маңғыстау мұнай газ» АҚ – 1963 жылы құрылған Қазақстанның мұнай-газ саласындағы ірі компаниясы. Компанияның 100% акциясы Mangistau Investments B.V. (MIBV) компаниясына тиесілі. Бұл компанияның 50%-ы Қазақстанның ұлттық мұнай-газ компаниясы «ҚазМұнайГаз»-ға, ал қалған 50%-ы Қытайдың CNPC Exploration and Development Company компаниясына тиесілі.
2024 жылдың 1 қазанына сәйкес, «ҚазМұнайГаз» ұлттық компаниясының 67,42% акциясы «Самұрық-Қазына» ұлттық әл-ауқат қорының меншігінде, 9,58% – Қазақстанның Ұлттық банкіне, 20% – Қазақстан Республикасының Қаржы министрлігіне, ал 3% акциялар еркін айналымда сатылымда.
Жанерке Мұрат,
«Тұран» университеті
Журналистика факультетінің 4 курс студенті