2025 жылдың ақпан айы қазақстандықтар үшін қысқа және жұмысқа толы болмақ, себебі бұл айда мемлекеттік мереке күндері жоқ. Сондықтан қазақстандықтар тек сенбі және жексенбі күндері ғана демалады.
Жалпы, жылдың ең қысқа айында қазақстандықтар 8 күн демалып, қалған күндері жұмыс істейді. Алайда, ақпан айында кәсіби және халықаралық маңызы бар мерекелер атап өтіледі. Бұл мерекелер жұмыс күндері болғанына қарамастан, кәсіби ортада және қоғам деңгейінде өз маңыздылығын сақтайды.
Ақпан айындағы кәсіби мерекелер
Қазақстан Республикасының Еңбек және халықты әлеуметтік қорғау министрінің 2023 жылғы 17 қарашадағы №480 бұйрығына сәйкес, ақпан айында келесі кәсіби мерекелер белгіленген:
1 ақпан – Қазақстан Республикасы Азаматтық авиация қызметкерлерінің күні;
2 ақпан – Ұлттық баспа күні;
15 ақпан – Кеңес әскерлерінің Ауғанстаннан шығарылған күні.
Халықаралық мерекелер
Сонымен қатар, БҰҰ күнтізбесіне сәйкес ақпан айында халықаралық деңгейде атап өтілетін мерекелер бар:
4 ақпан – Дүниежүзілік қатерлі ісікке қарсы күрес күні және Халықаралық адамзат бауырластығы күні;
10 ақпан – Дүниежүзілік дәнді-бұршақты дақылдар күні;
11 ақпан – Ғылымдағы әйелдер мен қыздардың халықаралық күні;
12 ақпан – Қызыл қол күні (соғыс пен қарулы қақтығыстарға тартылған балаларды еске алу күні) және Дарвин күні;
13 ақпан – Дүниежүзілік радио күні;
20 ақпан – Әлеуметтік әділеттілік күні;
21 ақпан – Халықаралық ана тілі күні;
27 ақпан – Дүниежүзілік үкіметтік емес ұйымдар күні.
Айжан ЖАРАСБЕКОВА,
"Тұран" университеті
Журналистика факультетінің 4 курс студенті.
