АҚШ барлау агенттігі Иранда ядролық қару жасап жатқанына қатысты дәлел таппады
2025 жылдың 18 маусымында АҚШ Сенатының барлау жөніндегі арнайы комитеті төрағасының орынбасары, демократ Марк Уорнер MSNBC телеарнасының эфирінде мәлімдеме жасап, Иранның ядролық қару жасау жұмыстары туралы ешқандай нақты дәлел жоқ екенін айтты. Бұл ақпаратпен сенаторлар екі күн бұрын Ұлттық барлау қызметі таныстырған.
Барлау деректері не дейді?
Сенатор Уорнер АҚШ Ұлттық барлау директоры Тулси Габбардтың 25 наурызда комитетке берген жазбаша баяндамасын еске салып, Иран «ядролық бомба жасау бағытында ешқандай әрекет жасамағанын» атап өтті.
«Біз осы аптада барлау қызметінен жаңа деректер алдық. Онда Иранның ядролық қару жасау жұмыстарына кіріспегені расталды», – деді Уорнер.
Тулси Габбардтың сөзіне қарағанда, АҚШ-тың 18 барлау агенттігінің бірігіп жасаған талдауы Иранның ядролық бағдарлама бойынша әскери бағытта жұмыс істемегенін көрсетеді. Және бұл бағдарламаны елдің рухани көсемі аятолла Хаменеи 2003 жылы-ақ тоқтатқаны нақтыланған.
Трамп: «Маған бәрібір»
Алайда дәл сол күні АҚШ-тың бұрынғы президенті Дональд Трамп журналистер алдында Иранның «ядролық қаруға қол жеткізуге небәрі бірнеше апта қалғанын» мәлімдеді.
«Маған бәрібір, ол (Габбард) не деді. Меніңше, Иран өте жақын болды (ядролық қаруға – ред.)», – деп жауап берді Трамп NBC арнасына берген пікірінде.
Ол Иранның ядролық әлеуетін шектеу қажет екенін бұрыннан айтып келе жатқанын атап өтті және «әскери араласуға» қарсы болғанымен, Иранның ядролық қаруға ие болуына жол беруге болмайтынын айтты.
Әскери соққы жоспары мақұлданған, бірақ…
ABC және The Wall Street Journal деректеріне сүйенсек, Трамп әкімшілігі Иранға әскери соққы жасау жоспарын алдын ала мақұлдаған, бірақ соңғы бұйрық берілмеген. Президент бұл шешімді кешіктіріп, Тегеранмен келіссөз жүргізу мүмкіндігін ашық қалдырған.
МАГАТЭ не дейді?
Мәселеге байланысты пікір білдірген МАГАТЭ (Халықаралық атом энергиясы агенттігі) бас директоры Рафаэль Гросси де Иранның ядролық қару жасау әрекеті анықталмағанын айтты.
«Иран уранды 60% деңгейінде байытып отыр – бұл әлемде жалғыз мысал. Бұл алаңдаушылық тудыратыны рас. Бірақ ядролық қару жасап жатыр деген нақты дәлел бізде жоқ», – деді ол Sky News арнасына берген сұхбатында.
Сонымен қатар, МАГАТЭ Израильдің Ирандағы ядролық нысандарға жасаған шабуылдарына алаңдаулы екенін айтты. Мұндай шабуылдар радиологиялық қауіп-қатерге, мысалы, радиоактивті бөлшектердің атмосфераға таралуына әкелуі мүмкін.
