Иран қолдап отырған топтар АҚШ-тың базаларына соққы жасамақ
23 маусым, 2025 ж. — Иран қолдауындағы қарулы топтар Ирак пен Сирия аумағындағы америкалық әскери базаларға қарсы қарулы шабуылдарға дайындық үстінде. Бұл туралы АҚШ барлау органдарына сілтеме жасап The New York Times хабарлайды.
Құрама Штаттардың қауіпсіздік қызметтері бірнеше апта бойы Таяу Шығыстағы шиеленіс күшейіп келе жатқанын және Иранның прокси-тобы ретінде әрекет ететін күштердің белсенділігі артқанын айтады. Қауіптенудің басты себебі — аталған топтардың АҚШ-тың Ирактағы «Аль-Асад», Сириядағы «Ат-Танф» және басқа да әскери базаларына дәл бағытталған әрекетке көшуі мүмкін екені.
Халықаралық бақылаушылардың айтуынша, бұл дайындықтар АҚШ пен Иран арасындағы шиеленістің ушығуына байланысты. Бұған дейін АҚШ Иранның Фордо қаласындағы ірі ядролық нысандарына соққы жасаған болатын. Осыдан кейін Тегеранмен байланысы бар «Катаиб Хезболла» секілді топтар АҚШ-қа жауап қайтаратынын ашық мәлімдеді.
Иран тарапы бұл топтардың әрекетіне ресми жауап бермегенімен, олардың артында тұрғаны көп жылдан бері белгілі. Қаржылай және әскери қолдау көрсету арқылы Тегеран бұл күштерді өз ықпалын кеңейтудің құралы ретінде пайдаланып келеді.
Ирак үкіметі бұл жағдайға алаңдаушылық білдіріп, Ираншыл қарулы топтармен байланыс орнатуға тырысып жатыр. Reuters агенттігінің мәліметінше, Ирак билігі шабуылдың алдын алу үшін түрлі келіссөздер жүргізіп, дипломатиялық арналарды пайдалануда.
Пентагон өкілдері қазіргі таңда барлық қауіпсіздік шаралары күшейтілгенін хабарлады. Аймақтағы америкалық әскерилердің жауынгерлік дайындығы жоғары деңгейге көтерілді. Сонымен қатар, АҚШ бұл шабуылдар жүзеге асса, өз базаларын қорғау үшін күш қолданатынын ашық мәлімдеді.
