Атыраудағы қанды қылмыс: Ақбаян Мұқанғалиева қазіргі уақытта қайда?
Атырау облысында бір отбасының өліміне қатысты қоғамда үлкен резонанс тудырған қылмыстық іс әлі де қызу талқыланып жатыр. Осы іске байланысты күдіктілердің бірі Ақбаян Мұқанғалиеваның қазіргі жағдайы жөнінде жаңа мәліметтер белгілі болды.
Бұған дейін күдіктілер Сұлтан Сәрсемалиев пен оның жұбайы Ақбаян Мұқанғалиеваның Индонезиядан Қазақстанға экстрадицияланғаны хабарланған еді. Кейінірек БАҚ-та Сұлтан Сәрсемалиев әйелінің ағасы мен әпкесі – Наурыз Мұқанғалиев пен Мейрамгүл Қарабалинаны өлтіргенін мойындағаны туралы ақпарат тарады. Ол мәйіттерді бұрын өзі жалға алған Геолог ықшам ауданындағы үйдің ауласына көмгенін айтқан.
Марқұмдардың туыстарының мәліметінше, қазіргі таңда Ақбаян Мұқанғалиева Атырау қаласындағы медициналық мекемелердің бірінде ем қабылдап жатыр.
"Оның бұрын психиатриялық есепте тұрған-тұрмағанын нақты білмейміз. Алайда енесінің айтуынша, қазір Ақбаян Атыраудағы психиатриялық орталықта емделіп жатыр", – деді туыстарының бірі.
Бұл жағдайға байланысты журналистер Атырау облыстық Полиция департаментіне ресми сұрау жолдағанымен, әзірге нақты жауап берілмеген. Сондай-ақ Денсаулық сақтау министрлігі мен өңірлік денсаулық сақтау басқармасына да сауал жіберілген.
Ал облыстық денсаулық сақтау басқармасы бұл мәселеге қатысты құқық қорғау органдарына жүгінуді ұсынды.
"Қылмыстық іс қозғалғандықтан, бұл сұрақтар бойынша тиісті ақпаратты құқық қорғау органдарынан алу қажет", – деп мәлімдеді басқарма өкілдері.
