Түркия президенті Режеп Тайып Ердоған қазан айында Қазақстанға жұмыс сапарымен келеді. Бұған дейін түрік көшбасшысы Қырғызстан президенті Садыр Жапаровпен 29 қыркүйек - 2 қазан аралығында Түркияның Изник қаласында өткен IV Дүниежүзілік көшпенділер ойындары аясында кездесті. Түркі мемлекеттерінің ұйымында бақылаушы мәртебесіне ие Түркіменстан көп ұзамай оның толық мүшесі бола алады. Бұл туралы Түркия СІМ Мевлют Чавушоглу мәлім етті, деп хабарлайды Taulik.kz сайты ng.ru сайтына сілтеме жасап.
Көшпенділер ойындары алғаш рет 2014 жылы Қырғызстанда, Чолпон-Атада ұйымдастырылды. Оған әлемнің 19 елінен 10 түрлі спорт түрінен спортшылар қатысты.
Бастамасы сәтті болып, Бішкек 2016 және 2018 жылдары Ыстықкөл жағасында өткен көшпенділердің екінші және үшінші дүниежүзілік ойындарын өткізу туралы шешім қабылдады. Содан кейін Түркия бұл бастаманы толықтай қолға алды. Ал көшпенділердің IV ойындарына әлемнің 102 елінен 3 мың спортшы қатысты.
Көшпенділердің келесі Дүниежүзілік ойындары Қазақстанда өтуі мүмкін. Астана ойынды өткізуге өтінім берді және осы мәселені шешуде Түркияның қолдауына сенеді. Бұл туралы Мәжіліс спикері Ерлан Қошанов Түркия президенті Режеп Тайып Ердоғанмен кездесуде хабарлады.
Мемлекет басшысы Қасым-Жомарт Тоқаевтың тапсырмасы бойынша Изникке келген Қошанов түрік көшбасшысының Астанаға сапарын да талқылады.
«Елдеріміз арасындағы ынтымақтастық жыл сайын нығайып келеді. Бұл – сіз бен Қасым-Жомарт Тоқаевтың арасындағы достық қарым-қатынас пен жемісті диалогтың нәтижесі. Осы жылдың қазан айына жоспарланған Қазақстанға сапарыңызды асыға күтеміз. Бұл сапар бауырлас елдеріміз арасындағы қарым–қатынасты жаңа деңгейге көтеріп, оларды одан әрі нығайтуға жаңа мүмкіндіктер туғызатынына сенімдімін», - деді Қошанов.
Естеріңізге сала кетейік, 2022 жылдың мамыр айында Тоқаев Түркияға мемлекеттік сапармен барған болатын. Ол сол кезде «Қазақстан үшін Түркия Еуразия құрлығындағы ең маңызды және сенімді серіктестердің бірі» деп атап өтті.
Taulik.kz
