45 күндік карьера: премьер-министр болған Лиз Трасс отставкаға кетті

45 күн бұрын сайланған Ұлыбританияның премьер-министрі Лиз Трасс отставкаға кетті, деп хабарлайды Taulik.kz сайты Sky News басылымына сілтеме жасап.

«Үлкен экономикалық және халықаралық тұрақсыздық кезеңінде қызметке кірістім. Халық пен кәсіпорындар электр энергиясы үшін төлемдерді қалай төлейміз деп алаңдап жатты», – деді Трасс.

Ол «қазіргі ситуацияда» өзіне жүктелген міндеттерді атқара алмайтынын мойындады. Шенеунік өзінің орнына басқа премьер-министр тағайындалғанға дейін қазіргі міндетін атқара тұратынын айтты. Консерваторлар партиясының жаңа жетекшісі мен премьер-министрді сайлау келесі аптада болады. Ол бұл қызметте бір жарым ай ғана жүрді және қазір ел тарихында ең аз уақыт премьер-министр болған адам атануы мүмкін. Бұрын бұл рекорд Джордж Каннингке тиесілі болған. Ол 119 күн премьер-министр қызметін атқарды. 1827 жылы қайтыс болуына байланысты қызметінен босатылған еді. Айта кетейік, Лиз Трасс бес апта бұрын басқарушы Консервативті партияның жетекшісі, яғни премьер-министр болып сайланды. Оның салық реформасы сынға ұшырап, қаржы министрін ауыстыруға мәжбүр болды.