Екібастұздағы жағдай Алматыда болуы мүмкін бе?

Ерболат Досаев Алматыда энергетикалық жүйе бойынша қандай жұмыстар атқарылып жатқанын айтты, деп хабарлайды Taulik.kz Tengrinews.kz сайтына сілтеме жасап. Алматы қаласы әкімінің міндетін атқарушы Ерболат Досаевпен кездесуде Түрксіб ауданының тұрғыны Екібастұз бен Риддерде болғандай, қаланы жылусыз қалдыруы мүмкін ірі апаттардың алдын алу жұмыстары жүргізілді ме, жоқ па деген сұрақ қойды. Досаев қалада мұндай жағдайлардың алдын алу жұмыстары жүргізіліп жатқанын атап өтті.

«Энергия жүйесі және жылумен қамтамасыз ету толық көлемде және талап етілетін сапамен қамтамасыз етілуі керек. Қысқа дайындық жұмыстарын қағаз жүзінде емес, бізде бардың бәрін, елеусіз тұстарды қарап шықтық. Қала дайын деп есептейміз. Бірақ жақында Мемлекет басшысы мен Премьер-министрден тағы да энергетика жүйесіне қосымша аудит жүргізу туралы тапсырма болды. Жұмыс 1 желтоқсанда басталады. «Самұрық-Энергомен» электрмен жабдықтау тексерісі өтеді. Жылу желілері бойынша алдағы екі аптада, 1-15 желтоқсан аралығында барлық қазандықтарды тексереміз. Әзірге қорқынышқа себеп жоқ, бәрі әдеттегідей жұмыс істеп тұр, бірақ апаттар әрқашан болуы мүмкін және бұған дайын болу керек», - деді ол.

Досаевтың айтуынша, кей учаскелерде құбыр жарылуы ықтимал, бірақ қаланың төтенше жағдайлар қызметі мұндай жағдайларға дайын.