Мариупольді қалпына келтіруге қырғыз азаматтарын да тартып жатыр

Мигранттар өзара араласатын Telegram-каналдарында тұрақты түрде жұмысқа вакансия жарияланып тұрады. Соңғы кезде Ресей басып алған Украинаның Мариуполь қаласына жұмысқа шақыру жөнінде жарнама көбейді. Онда айына 100 мың рубль айлық ұсынып жатыр, деп хабарлайды taulik.kz Азаттық радиосына сілтеме жасап. Азаттықтың Қырғыз қызметі жарнамадағы телефон нөмерлеріне хабарласқанда, Бішкекте Мариупольға адамдар жіберетін арнайы топ барын анықтады. Олар Мариупольға барып жұмыс істегісі келетіндерді Қазақстан арқылы шығарып алады екен. Алайда Қырғызстанның ІІМ бұл мәліметті терістеп, тексеру жүріп жатқанын жеткізді. Дереккөздер мәліметінше, қазір Мариупольда ондаған қырғыз азаматы жұмыс істеп жатыр. "Менің бір танысым сонда жұмыс істейді. Күніне 5000 рубль, айына 100 мың рубль төлеп жатыр. Бәрі құрылыста, қирап қалған ғимараттарды қалпына келтіріп жатыр", - деді қырғызстандықтың бірі. Мариуполь қазір көктемнен бері Ресей әскерінің бақылауында. Осы уақыттан бері 25 мың адам қайтыс болды, олардың 7 мыңы бейбіт тұрғын. Кремль қазір онда қалпына келтіру жұмысы жүріп жатқанын мәлімдеп, Орталық Азиядан шыққан мигранттарды жұмысқа тартып жатқанын жеткізген. Осының алдында қазақстандықтар, өзбекстандықтар мен тәжікстандықтарды да Мариупольға жұмысқа тартып жатқаныны хабарланған болатын.