Ақтауда бүрсең қаққан сәбилер балабақшада бірнеше қабат қабатта киіммен жүруге мәжбүр, деп хабарлайды taulik.kz ақпарат агенттігі Ulysmedia.kz сайтына сілтеме жасап.
"Балабақшада екі айдан бері жылу жоқ. 12 шағынауданындағы №40 тұрғын үйдің тұрғындары жылыту үшін қуатты сорғы қойды, барлық жылу сонда кетеді. Сондай-ақ, балабақша директорының айтуынша, олар дәліздердегі жылу топтарға түсу үшін көтергіштерді ауыстырған. Біз балаларды қабат-қабат киіндіруге мәжбүрміз, балабақша суық болғандықтан жиі ауырады. Бақша кондиционерлермен және жылытқыштармен жылытылады, алайда жылу барлық топтарға жете бермейді. Басшылық сорғы сатып алмақ. Бірақ бұл мәселені шеше ме, жоқ па – белгісіз. Дереу шаралар қабылдануы керек, өйткені мектеп жасына дейінгі балалар бүрсең қағып отыр. Ал сорғы қашан орнатылатыны беймәлім", - деді ата-аналар.
Балабақша директоры Ольга Ергизованың айтуынша, балабақшада ауа температурасы – 18-22 градус, яғни Санитарлық-эпидемиологиялық нормаларға сай.
"Балабақшаны жылытуда проблема жоқ. Барлық топтарда жылу бар. Бұл жалған ақпарат, бақшада екі ай бойы жылу болмады деген ақылға сыймайды. Жалғыз нәрсе, кеше, 9 қаңтарда, демалыс күндерінен кейін жатын бөлмелердің бірінде ауа температурасы төмендеді. Біз бірден жылытқыштарды қосып, апаттық бригаданы шақырдық. Олар жылу жүйесінде айналымды реттеді", - деді Ольга Ергизова.
Басшылық мәліметінше, жылу жүйесінің айналымын жақсарту үшін жер үсті сорғысын орнатуға дайындық жүріп жатыр.
