25 жастағы спортшыны әкесі қызғанып, бес жерінен атып өлтірген
Үндістанда 25 жастағы танымал теннисші Радхика Ядавты туған әкесі атып өлтірді. Қайғылы оқиға Гуруграм қаласында орын алған. Жергілікті БАҚ мәліметінше, Радхика Ядав спорттағы жетістіктерімен танылып келе жатқан, Харьяна штатынан шыққан болашағынан зор үміт күттіретін теннисші болған. Полиция дерегіне сәйкес, әкесі оған бес рет оқ атқан, үшеуі арқасына тиген. Жарақат салдарынан Радхика ауруханаға ауыр халде жеткізілгенімен, дәрігерлер оның өмірін аман алып қала алмады.
Бастапқыда қылмыстың себебі ретінде тұрмыстық жанжал аталған. Бірақ кейін тергеу барысында туыстар мен көршілердің пікірі бойынша, әкесі қызынан қызғанышпен қарай бастағаны белгілі болды. Радхика өзінің жеке теннис академиясын ашып, табыс тауып жүрген, ал отбасы сол табысқа тәуелді болған. Бұл жағдай әкесінің ашу-ызасын тудырған. Сондай-ақ ол қызының әлеуметтік желідегі белсенділігіне, қысқа видеолар түсіріп, көпшілік алдында танымал бола бастағанына наразылық білдірген.
Қазіргі уақытта полиция күдіктіні қамауға алып, істі тергеу жалғасып жатыр. Бұл қайғылы жағдай Үндістан қоғамын дүр сілкіндірді. Радхика Ядавтың өлімі – отбасылық қатынастар мен гендерлік теңсіздік мәселесін қайтадан күн тәртібіне шығарған ауыр қасіретке айналды. Спортшылар мен қоғам белсенділері бұл оқиғаға қатысты әділ тергеу жүргізуді және әйелдердің қауіпсіздігіне көбірек көңіл бөлуді талап етуде.
