Әкесі өз ұлын итше сабап, көлік артына байлап сүйреген (ВИДЕО)
Әлеуметтік желілерде әкесі өз баласын қатыгездікпен азаптап жатқан бейнежазба тарап, үлкен қоғамдық резонанс туғызды. Бейнежазбада бала қорланып, жылап, өмірі үшін жалбарынып отыр. Әкесі оны 600 сомони алып, әпкесіне Душанбе қаласына рұқсатсыз барғаны үшін жазалап жатқанын айтады.
Жазбаны жариялаған — Parviz TV медиа тобының жетекшісі Парвиз Тагоев. Бұл парақша Facebook, Instagram және TikTok желілерінде белсенді түрде жүргізіліп келеді. Тагоевтың аты-жөні Тәжікстанның Мемлекеттік қауіпсіздік комитетімен (КГБ) байланыстырылады.
Куәгерлердің айтуынша, ер адам баласын әпкесінен алып кеткен соң, қол-аяғын байлап, аптап ыстықта екі шақырымға жуық жерге көліктің артынан сүйреткен. Жаралы, әлсіреген бала жерде жылап отырып:
— «Мен насвай шайнаған жоқпын, тек ақшаны алып, жұмсадым», — деп шырылдайды.
Ал әкесі оған:
— «Мен сені өлімші етіп сабадым, бәрібір тоқтамадың», — деп жауап береді.
Кейбір дереккөздерге сәйкес, бала алған жарақаттардан кейін көз жұмған.
Бейнежазба жарияланған алғашқы сағаттарда-ақ мыңдаған қаралым мен ашынған пікірлер жиналды. Белгілі белсенділер мен желі қолданушылары бұл әрекетті «жабайылықтың шегі» деп бағалап, баланың өлімін бүкіл ұлт үшін моральдық дағдарыстың көрінісі деп атады.
Желі қолданушылары не дейді:
«Бір жаңалық бірінен сорақы. Адамдар не болып барады? Байғұс балалар…» – Сакина Каримова
«Бала өлтіру — Тәжікстан қоғамының жаңа дертінің көрінісі. Бұл – кедейлік, күйзеліс пен моральдің күйреуінің салдары» – "Точка зрения"
«Қайда бара жатырмыз? Бұл әлем жабайылыққа айналып барады» – Малика Леди
«Мұндай адамды дереу жазалау керек – жануар да бұлай етпейді» – Зариф Ахтамзода
Оқиғаға байланысты Тәжікстан ІІМ де, Мемлекеттік қауіпсіздік комитеті де әлі ешқандай ресми түсініктеме бермеген. Қай жерде, қай уақытта түсірілгені және тергеу жүріп жатқаны туралы ақпарат жоқ.
Азаматтық қоғам мен құқық қорғаушылар әділ әрі шұғыл тергеу жүргізуді талап етуде. Парвиз Тагоевтың аты аталса да, оның күш құрылымдарымен байланысы — тергеуге кедергі келтіруі мүмкін деген қауіп те айтылуда.
