Қарағандыда екі жігіт микроқаржы ұйымын тонап, Астанаға қашып кеткен, деп хабарлайды taulik.kz Sputnik.kz сайтына сілтеме жасап.
Оқиға 5 мамыр күні сағат 18:00 шамасында болды. Қарағанды қалалық полиция басқармасына несие беретін ұйымның мамандары шағымданған.
Олардың айтуынша, белгісіз екі азамат шағын микроқаржы ұйымына баса-көктеп кіріп, 30 жастағы менеджер әйелді тапаншаға ұқсас затпен қорқытып, 1 млн 29 мың теңгені алып кеткен, деп хабарлайды Polisia.kz.
«Ауыр қылмысты ашу үшін жедел-іздестіру тобы құрылды. 7 мамыр күні жүргізілген кешенді іс-шаралар барысында Астана қаласынан осы іске қатысы бар деген күдікпен 23 және 25 жастағы екі адам ұсталды. Айғақ заттар тәркіленді», - деп мәлімдеді Қарағанды облыстық ПД бастығының орынбасары Әбіл Әбілдин.Қылмыстық кодекстің 192-бабы 2-тармағы бойынша қылмыстық іс тіркелді. Күдіктілер уақытша ұстау изоляторына қамалды. Олар бес жылдан он жылға дейін бас бостандығынан айырылуы мүмкін. Тергеу жүріп жатыр.