Екатеринбургтегі арнайы операциядан кейін Мәскеу мен Баку арасы шиеленісе түсті
Өткен аптада Ресейдің Екатеринбург қаласында бірнеше әзербайжандықтың ұсталуынан кейін Мәскеу мен Баку арасындағы қарым-қатынас қайта шиеленісті. Оқиға 27 маусым күні таңертең бірнеше пәтерде жүргізілген арнайы операция барысында болған. Әзербайжан тарабының мәліметінше, Агдам қаласының тумалары — Сафаровтар отбасының екі ұлы, Зияддин мен Гусейн, операция кезінде қаза тапқан. Тағы бірнеше азамат жарақат алып, ауруханаға жеткізілген.
Бір оқиға — екі түрлі нұсқа
Ресми Баку 27–28 маусым күндері Екатеринбургте 50-ден астам әзербайжан азаматы ұсталғанын хабарлады. Оның ішінде бірнеше адам жарақаттанып, екеуі көз жұмған. Алайда Ресей тарапы бұл ақпаратты растаған жоқ. Ресей СІМ ұсталғандарды «Әзербайжаннан шыққан Ресей азаматтары» деп сипаттады.
Свердлов облысының ІІМ және Тергеу комитеті бұл ұсталу 2001–2011 жылдары болған кісі өлтіру қылмыстарына қатысты тергеумен байланысты екенін алға тартады. Ұсталғандар саны ресми түрде айтылмағанымен, ресейлік ura.ru сайты 50-ге жуық азаматтың ұсталғанын жазды.
Әзербайжанның «Азертадж» агенттігі 9 адамның ұсталып, оның 6-уы қамауға алынғанын, қалғандары бойынша Екатеринбург сотында бұлтартпау шарасы қаралып жатқанын хабарлады. Ұсталғандардың бірінің адвокаты қорғауындағы азаматтың жүруге жарамсыз екенін мәлімдеді.
ФСБ қатысы бар ма?
Желіде тараған видеода Екатеринбург тұрғыны Рамиль Сафаров таңертең үйіне ФСБ қызметкерлері басып кіріп, өзін және әкесін ұрып-соғып, мойындауға мәжбүрлегенін айтқан. Алайда Ресей билігі ФСБ-ның бұл операцияға қатысқанын ресми түрде айтқан жоқ. Тергеу комитеті мен ІІМ бұл іс-шараның СОБР арнайы жасағының қатысуымен жүргізілгенін мәлімдеген.
Тағы оқыңыз: Әзербайжан ресейлік барлық мәдени іс-шарадан бас тартты
Саяси астар бар ма?
Ресей СІМ өкілі Мария Захарова Әзербайжан тарапына ресми түсініктемелер берілгенін мәлімдеді. Ал Әзербайжан парламентінің депутаты Расим Мусабеков бұл жағдайды «әзербайжандықтарды Ресейден күштеп шығару операциясы» деп бағалап, оқиғаның артында саяси себептер барын жоққа шығармады.
Ол: «Бұл қандай да бір жергілікті бастама ма? Әлде Мәскеу тарапынан Бакуге деген ашық наразылық білдіру ме? Жергілікті билік әзербайжан диаспорасына көптен бері тіс қайрап жүрген болуы мүмкін», — деп пікір білдірді.
Қос тараптың бұл жағдайды әртүрлі бағалауы — Мәскеу мен Баку арасындағы геосаяси сенімге сызат түскенін аңғартады. Әзірге мәселе дипломатиялық жолмен шешілуі тиіс екені айтылуда.
Тағы оқыңыз: Әзербайжанда ресейлік ФСБ агенттері ұсталды: олар редакцияда жұмыс істеген
