11 қыркүйекте елімізде сейсмикалық жаттығулар өткізіледі, деп хабарлайды Taulik.kz.
"Тұрғындарды белсенді қатысуға шақырамыз. Сейсмикалық жаттығулар барысында тұрғындар жойқын жер сілкінісі кезіндегі өзін-өзі ұстау ережелерімен танысып, қауіпсіз орындарды анықтау, зардап шеккен халықтың қабылдау пункттеріне жиналуы сияқты кейбір іс-әрекеттерді іс жүзінде пысықтайтын болады. "Баршаның назарына!" сигналын естіген кезде сабыр сақтаңыздар", - делінген Төтенше жағдайлар министрлігі хабарламасында.
Ulysmedia.kz жазуынша, министрлік тұрғындарға мүмкіндігінше ғимараттан шығу қажеттігін мәлімдеген. Ал ғимараттан шығу мүмкіндігі болмаған жағдайда қауіпсіз жерді паналай тұру қажет.
"Сейсмикалық жаттығулар "Жер-2023" республикалық командалық-штабтық оқу-жаттығуы аясында өткізіледі. Оның негізгі мақсаты – халықты жер сілкінісіне дайындау, оларға жалпы қауіпсіздік мәдениетін үйрету, сонымен қатар азаматтық қорғау күштерінің жер сілкінісі кезіндегі іс-әрекеттерге әзірлік деңгейін арттыру", – деп мәлім етті ведомство.
Сейсмикалық қауіпті өңірлерде жаттығулар сағат 10:00-ден 11:00-ге дейінгі аралықта өтеді.