Алматы облысында еңбек ардагері 24 мың теңге ғана зейнетақы алатынын айтып, шағымданды, деп хабарлайды Taulik.kz Almaty.tv арнасына сілтеме жасап.
Кәсіпорында еңбек жолы туралы мұрағат пен еңбек кітапшасы жоғалып кеткендіктен қария 20 жылға жуық уақыт ең аз зейнетақы алып келеді. Зейнеткер туыстарының көмегі болмағанда өмір сүру қиын болатынын айтады.
“Осындай дәрежеге қалай жеттік? 50 жылдай жұмыс істедім. Нәтижесінде тіпті зейнетақымды өтей алмаппын. Біз адал өмір сүрдік, жұмысты барынша істедік. Қандай өкінішті. Енді ешкімге керек емес болып қалдым. Азда болсын қамқорлық жасаған балаларым мен немереме өмір сүруге мүмкіндік бергені үшін алғыс айтамын. Әйтпесе, әлдеқашан кететін едім", – деді еңбек ардагері.
Василий Кулеш ең болмағанда еңбек қызметі туралы жазбаларды табуға тырысып, мемлекеттік мұрағатқа жүгінгенін, алайда нәтиже болмағанын айтады. Ал жергілікті билік болса, мәселені тек сот арқылы шешу керек екенін жеткізіпті. Дегенмен оның да өзіндік шарттары бар екен.
“Тәжірибе еңбек кітапшасымен расталады. Ол болмаған жағдайда еңбек өтілі жұмыс немесе мемлекеттік мұрағат туралы мәліметтермен расталады. Мұрағатта деректер болмаса, немесе сақтауға түспесе, еңбек өтілі тек сот шешімімен бекітіледі", - дейді Талғар аудандық әлеуметтік қамсыздандыру бөлімінің басшысы Құралай Тоқымтаева.
Сотқа жүгіну үшін бір кәсіпорында жұмыс істеген кемінде екі куәгер қажет. Дегенмен Василий Кулеш 20 жыл бұрын зейнеткерлікке шыққан. Ал оның бұрынғы әріптестерін табу оңай шаруа емес.
Дегенмен зейнеткердің бұрынғы әріптесі Валентина Сельцова Василийдің жағдайын естіп таңғалған екен.
“Оны жақсы білетінмін. Еңбек ардагері ретінде лайықты төлем алуы керек қой. 23-24 мың теңгемен неге жетеді, ол қалай өмір сүреді?! Мен жұмыс істеп, содан кейін мұрағатта деректер болмағандықтан қалыпты зейнетақы ала алмай жүрген көптеген адамдар туралы білдім", - деді Валентина Сельцова.
Василий Кулештің жалғыз үміті - сотта жұмыс тәжірибесін растайтын басқа да әріптесін табу. Бұл арада ол ең төменгі күнкөріс деңгейінен де төмен сомаға өмір сүруі керек. Өйткені, зейнеткер мемлекеттен ешқандай көмек алмайды.