Қазақстанның Қаржыгерлер қауымдастығының мәліметі бойынша Krisha.kz порталы 2025 жылы ипотекалық несиенің арзандау мүмкіндігін және бұл үшін қажетті реформалар туралы сарапшылардың пікірлеріне шолу жасады, деп хабарлайды Taulik.kz.
Ипотекалық мөлшерлемелерді төмендету мүмкіндігі бар ма?
Қазақстанның Қаржыгерлер қауымдастығының бас аналитигі Рамазан Досовтың айтуынша, ипотекалық мөлшерлемелердің төмендеуі елдегі макроэкономикалық жағдайлар мен тұрғын үй саласын ынталандыру бойынша мемлекеттік саясатқа байланысты болмақ.
Ипотеканы қолжетімді етуге қандай шарттар қажет?
- Инфляцияның төмендеуі. Тұрақты төмен инфляция деңгейі Ұлттық банкке негізгі мөлшерлемені азайтуға мүмкіндік береді, бұл ипотека бойынша пайыздық мөлшерлемелердің төмендеуіне негіз болмақ.
- Халықтың нақты табысының өсуі. Бұл фактор қарыз алушылардың төлем қабілеттілігіне және несиелік тәуекелдерге әсер етеді.
- Арнайы бағдарламаларды тек мұқтаж жандарға ғана ұсыну. Тек мұқтаж жандарға арналған жеңілдіктер арқылы экономикалық тиімділікке қол жеткізуге болады.
- Тұрғын үй нарығының механизмдерін қалпына келтіру. Барлық банк ұйымына тең жағдай жасау арқылы ипотеканың қолжетімділігін арттыру қажет.
2025 жылға болжам
2025 жылға қарай Қазақстанның қаржыгерлері базалық мөлшерлеменің 14.25%-дан 11.5-12%-ға дейін төмендеуін болжайды. Бұл өзгеріс нарықтық ипотека бойынша шарттарды 225-275 базистік пунктке жақсартуға мүмкіндік береді, бұл ұзақ мерзімді несиелер үшін айтарлықтай әсер етеді.
Рамазан Досовтың айтуынша, өткен жылдардағы тұрғын үй секторын қолдау шараларының тиімділігін кешенді түрде талдау маңызды. Әлемдік тәжірибемен салыстыра отырып, Қазақстандағы тиімсіз тұстарды анықтауға және ипотека мен тұрғын үй нарығын одан әрі жақсартуға болады.
