Ұлттық статистика бюросы «2021 жылғы халық санағының» тақырыптық жинақтарын жариялады.
Мамандар санақ қорытындысы бойынша елімізде қала тұрғындарының үлесі 5 пайыздық тармаққа өскенін мәлімдеді. – 56,1%-дан 61,2% дейін. Тиісінше, ауыл халқының үлесі 43,9%-дан 38,8% дейін азайды.
"Қала халқының саны 2,7 млн-нан астам адамға артты. Өткен 12 жыл ішінде қала халқының ең жоғары өсімі еліміздің 6 өңірінде – Ақтөбе, Атырау, Батыс Қазақстан, Қызылорда, Маңғыстау, Түркістан облыстарында байқалды.
Ең урбанизацияланған аймақ – Қарағанды облысы, онда халықтың 80% - қала тұрғындары (1 млн-нан астам адам)", - делінген хабарламада.
Республикалық маңызы бар қалалар бойынша, санақ кезінде Астанада 1,23 млн адам тұрды, елорда халқы 12 жылда 2 есе өсті. Алматыда халық саны 2,03 млн адамды құрады, мегаполис тұрғындарының саны 580,6 мың адамға артты. Шымкент қаласының халқы 1,1 млн тұрғынды құрап, 381,6 мың адамға өсті.
